མཁྱེན་བརྩེ་ནུས་གསུམ་དང་ལྡན་པའི་བདག་ཉིད་འཇམ་དཔལ་དབྱངས།
དགོས་པ།
འཇམ་དཔལ་དབྱངས་ཀྱི་མཁྱེན་རབ་མཁྱེན་པའི་ཡེ་ཤེས་འདི། སྤང་བྱ་འདོད་ཆགས་ཞེ་སྡང་ལ་སོགས་པའི་ཉོན་མོངས་པའི་སྒྲིབ་པ་དང་། གཉིས་སྣང་འཁྲུལ་པའི་རྩ་བ་ཤེས་བྱའི་སྒྲིབ་པའི་མུན་པ་རྩ་བ་ལས་བཅོམ་ཚར་བའི་ཡི་དམ་གྱི་ལྷའི་ལྷ་མཆོག་ཏུ་འགྱུར་པ་ཅིག་ཨིན། དཔེ་འབད་བ་ཅིན་ གནམ་མཁའ་ལུ་ ས་སྨུག་གིས་མ་སྒྲིབ་པའི་ཉིམ་བཟུམ་ རྗེ་བཙུན་འཇམ་པའི་དབྱངས་ཀྱི་མཁྱེན་པའི་ཤེས་རབ་འདི་ཡང་ ཤེས་བྱའི་ཆོས་ག་ར་རྣམ་པར་དག་ཏོག་ཏོ་དང་ གསལ་ཏོག་ཏོ་མཁྱེན་པའི་ཡེ་ཤེས་ཅིག་ཨིན།
མཁྱེན་པའི་ཡེ་ཤེས་འདི་གིས་ གཟུགས་ལས་རྣམ་མཁྱེན་གྱི་བར་གྱི་བསྡུས་པའི་ཆོས་
ག་དེམ་ཅིག་ཡོདཔ་ འདི་ཚུ་ག་ར་གི་ངོ་བོ་དང་ཁྱད་པར་
དོན་དག་ག་དེ་སྦེ་ཡོདཔ་ཨིན་ན་མཁྱེན་ཚར་ཚར་བའི་བདག་ཉིད་ཅན་ཅིག་ཨིན། འདི་ཚུ་མཁྱེན་ཚར་ཚརཝ་ཨིན་ཟེར་བའི་བརྡ་ཚོན་ལུ་
རྗེ་བཙུན་འཇམ་པའི་དབྱངས་ཀྱི་ཐུགས་ཁ་ལུ་སངས་རྒྱས་བཅོམ་ལྡན་འདས་ཀྱི་གསུངས་པའི་ཤེས་རབ་ཀྱི་ཕར་རོལ་ཏུ་ཕྱིན་པའི་་གླེགས་བམ་འཛིན་ཏེ་ཡོད་པའི་རྒྱུ་མཚན་ཡང་འདི་ཨིན་མས།
ང་བཅས་སེམས་ཅན་ཚུ་ སྲིད་པའི་རྩེ་མོ་ལས་ དམྱལ་བ་མནར་མེད་ཀྱི་བར་གྱི་ བརྩོན་ཁང་ནང་ཚུད་ཚུདཔ་བཟུམ་སྦེ་དང་ མ་རིག་པའི་མུན་པ་སྟུག་པོ་གི་མགོ་མཐོམས་ཏེ་ སྡུག་བསྔལ་གསུམ་གྱིས་ ར་གཟིར་མི་ཚུ་ལུ་བརྩེ་བའི་སྙིང་རྗེ་གིས་གཟིགས། དཔེར་ན་ བུ་གཅིག་ལས་མེད་པའི་ཨའི་གིས་བུ་ལུ་བྱམས་སྐྱོང་འབད་དོ་བཟུམ་ འཇམ་པའི་དབྱངས་ཀྱིས་ཡང་ ང་བཅས་སྡུག་བསྔལ་གྱི་མནར་ཏེ་སྡོད་མི་སེམས་ཅན་ཚུ་ སངས་རྒྱས་ཀྱི་གོ་འཕང་ལུ་བཀོད་ནི་དོན་ལུ་ཆོས་གསུངས་ མ་རིག་པའི་གཉིད་མཐུག་པོ་གིས་གཉིད་ལོག་སྡོདཔ་བཟུམ་མའི་ སྡུག་བསྔལ་གྱིས་མནར་མི་སེམས་ཅན་ཚུ་འཁོར་བ་རྒྱ་མཚོ་བཟུམ་མའི་གནས་ལས་ཐར་ནི་དོན་ལུ་དང་།
ང་དང་ང་ཡིར་འཛིན་པའི་མ་རིག་མུན་པ་སེལ་ མ་རིག་པ་དེ་ལས་བསྐྱེད་པའི་ སྐྱེ་རྒ་ན་འཆི་ལ་སོགས་པའི་ སྡུག་བསྔལ་གྱི་མྱུ་གུ་རྩ་བ་ལས་བཅད་ནིའི་དོན་ལུ་ ཡེ་ཤེས་ཀྱི་རལ་གྲི་བསྣམས་མི་ཡང་རྒྱུ་མཚན་འདི་ལས་བརྟེན་ཨིན་མས། སྤྱིར་བཏང་ འཇམ་པའི་དབྱངས་ཁོ་ར་ངོ་བོ་ལུ་ སྒྲིབ་གཉིས་བག་ཆགས་དང་བཅས་པ་ཕར་སྤང་སྟེ་ རབ་ཏུ་དགའ་བ་ལ་སོགས་པའི་ས་བཅུའི་བྱང་ཆུབ་སེམས་དཔའ་ རྟོགས་པའི་ཡོན་ཏན་ག་ར་ཡོངས་སུ་རྫོགས་ཏེ་སངས་རྒྱས་ཚར་བའི་ སངས་རྒྱས་དངོས་ཨིན།
ཨིན་རུང་
ང་བཅས་སེམས་ཅན་འདི་ཚུ་ འཁོར་བ་འདི་ལས་ཁ་དྲང་བའི་དོན་ལུ་
རྒྱལ་བ་སྲས་དང་བཅས་པའི་རྒྱལ་སྲས་ས་བཅུའི་བྱང་ཆུབ་སེམས་དཔའི་སྐུའི་རྣམ་པ་སྦེ་བཞུགས་ཡོད་མི་འདི་ཡང་རྒྱུ་མཚན་འདི་ལས་བརྟེན་ཏེ་ཨིན་མས།
སྐུ་འདི་ཡང་སངས་རྒྱས་ཀྱི་མཚན་བཟང་པོ་བརྒྱ་དང་བཅུ་གཉིས་ཀྱི་རྒྱན་གྱིས་བརྒྱན་ཏེ་
ཡོན་ཏན་ཡོངས་སུ་རྫོགས་པའི་ ཡི་དམ་གྱི་ལྷ་འཇམ་པའི་དབྱངས་འདི་
མ་རིག་པའི་མུན་པ་ཐམས་ཅད་སེལ་བའི་ལྷ་མཆོག་ཏུ་འགྱུར་པ་ཅིག་འབདཝ་ལས་ རྗེ་བཙུན་འཇམ་པའི་དབྱངས་ལུ་དུས་དང་རྣམ་པ་ཀུན་ཏུ་
སྒོ་གསུམ་གུས་པ་ཆེན་པོའི་སྒོ་ལས་ཕྱག་འཚལ་གསོལཝ་བཏབ་སྟེ་ མི་ཕྱེ་པའི་དད་པ་བསྐྱེད་དེ་གཏང་དགོཔ་འདི་གནམ་མེད་ས་མེད་ཁག་ཆེ།
དེ་འབདཝ་ལས་ང་བཅས་རའི་རྒྱུད་ལུ་བྱིན་རླབས་འཇུག་ནི་དང་
ཤེས་བྱའི་མཐའ་ག་དེམ་ཅིག་ཡོདཔ་
རྟོགས་ཚུགས་ནི་དོན་ལུ་སེམས་རྩེ་གཅིག་ཏུ་བསྐྱལ་ཏེ་གཏང་ནི་ཨིན་ཟེར་དམ་བཅའ་འབད་དགོ་ཟེར་ཞུ་ནི་ཨིན།
།
གང་གི་བློ་གྲོས་ཀྱི་ངོ་བོ་དང་ འབྱུང་ཁུངས།
༡ གང་གི་བློ་གྲོས་འདི་སྔོན་རྒྱ་གར་ལུ་པཎྜི་ཊ་
༥༠༠ གིས་བརྩམས་གནང་ནུག
༢ གང་གི་བློ་གྲོས་ འཇམ་དབྱངས་གསོལ་འདེབས་བཏང་བའི་ཕན་ཡོན་བསམ་གྱི་མི་ཁྱབ་པ་ཡོད་ འགྱུར་
བ་མེད་པའི་ཤེས་རབ་ཐོབ་ཚུགས།
༣ གདུལ་བྱ་ག་གི་བཏང་རུང་ འཇམ་པའི་དབྱངས་འདི་ ལྷ་གཞན་དང་མ་འདྲཝ་ལས་བྱིན་རླབས་གཞན་ལས་ལྷག་པའི་ཕན་ཡོན་ཡོད།
༤ ག་ར་འབད་རུང་འཇམ་དབྱངས་གསོལ་འདེབས་ཚར་ ༧, ༢༡, ༡༠༠, ༡༠༠༠ ལས་ལྷག་ དད་པ་བསྐྱེད་དེ་བཏང་ཚུགས་པ་ཅིན་
མ་རིག་པ་ མ་ཤེས་པའི་མུན་པ་སེལ་ སློབ་སྦྱོང་ལ་སོགས་པའི་བྱ་བ་ག་ཅི་འབད་རུང་ མི་བརྗེད་པའི་ཤེས་རབ་
དྲན་པའི་ཁྱད་ཆོས་ རིག་པའི་རྣམ་དཔྱོད་ཐོབ་སྟེ་ འཆད་རྩོད་རྩོམ་པའི་བྱ་བ་ལུ་རྣམ་དཔྱོད་རིག་པ་ཐོབ་སྟེ་
གཞན་དབང་དུ་བསྡུ་བའི་སྤོབས་པ་ཐོབ་ཚུགས།
༥ གཞན་ཡང་ཤེས་རབ་དང་སྙིང་རྗེ་བརྩེ་བ་གོང་དུ་འཕེལ་ཏེ་ ས་དང་ལམ་གྱི་རིམ་པ་ཡོངས་སུ་རྫོགས་ཏེ་
ཐམས་ཅད་མཁྱེན་པའི་གོ་འཕང་ཐོབ་མ་ཚད་ སེམས་ཅན་གྱི་འགྲོ་དོན་མཛད་དེ་ འཁོར་བའི་སྡུག་བསྔལ་གྱི་རྒྱ་མཚོ་ལས་གྲོལ་བའི་
ནུས་པ་ཐོབ་ཚུགས་ནི་ཨིན་མས། །
འཇམ་དཔལ་དབྱངས་སྒོམ་ཐངས།
༡ རྗེ་བཙུན་འཇམ་པའི་དབྱངས་ཀྱི་གསོལ་འདེབས་བཏངམ་ད་ ང་གིས་སེམས་ཅན་ཚུ་སངས་རྒྱས་ཀྱི་གོའཕང་ལུ་བཀོད་ནི་ཨིན་ཟེར་ མནོ་བསམ་བཏང་སྟེ་ སྨོན་ལམ་དང་རེ་འདོད་བསྐྱེད་དགོ དེ་ལས།
༢ དུས་གསུམ་གྱི་སངས་རྒྱས་ཀུན་གྱི་ངོ་བོ་ རྣམ་སྤྲུལ་འཇམ་པའི་དབྱངས་འདི་ རང་གི་རྩ་བའི་བླ་མ་དང་འཇམ་པའི་དབྱངས་དབྱེ་བ་མེད་པར་སྒོམ་པའི་ ཡི་དམ་གྱི་ལྷ་འཇམ་དཔལ་དབྱངས་ལུ་ དད་པའི་སྒོ་ལས་ ཤེས་རབ་དང་མཁྱེན་པའི་ཡེ་ཤེས་ཞུ། ཤེས་རབ་འདི་གིས་ སེམས་ཅན་ལུ་ཕན་པའི་འགྲོ་དོན་འབད་ཚུགས་པའི་ ལྕོགས་སྒྲུབ་ཐོབ་ དེ་མ་ཚད་དབང་དང་བྱིན་རླབས་འདི་གིས་ སེམས་ཀྱི་གནས་ལུགས་རྟོགས་ཚུགསཔ་ཅིག་ཟེར་ སེམས་ལེགས་བཅོས་འབད་ནི་ཨིན་ཟེར་བའི་ མོས་པ་བསྐྱེད་དགོཔ་ཨིན་མས།
༣ འ་ནི་བཟུམ་གྱི་ སྨོན་ལམ་འདི་ལུ་ ཡིད་ཆེས་དང་བློ་གཏད་བསྐྱེད་དེ་ ད་རེས་ལས་འགོ་བཟུང་སྟེ་ ན་རུང་གསོན་རུང་། དགའ་རུང་སྐྱོ་རུང་། དགའ་རུང་སྡུག་རུང། སེམས་ཅན་ཚུ་སངས་རྒྱས་ཀྱི་ས་ལུ་མ་བཀོད་ཚུན་ ང་གིས་འཇམ་དཔལ་ཡེ་ཤེས་སེམས་དཔའ་ ཡི་དམ་གྱི་ལྷ་འདི་ལུ་ གསོལཝ་བཏབ་ནི་འདི་བཀོག་མི་བཞག་ཟེར་ རེ་འདོད་བསྐྱེད་དགོ །
༤ དེ་ལས་རིམ་པ་བཞིན་ སྒོམ་པའི་སྐབས་བཅོས་མ་མ་ཡིན་པའི་སྟོང་པའི་རང་བཞིན་ འོད་ཟེར་གྱི་རང་བཞིན་སྦེ་སྒོམ་ འོད་ཟེར་འདི་ལས་ རང་འཇམ་པའི་དབྱངས་སྐུ་མདོག་གསེརཔོ་ཞལ་གཅིག་པ་ ཕྱག་གཉིས་ ཕྱག་གཡསཔ་ཤེས་རབ་ཀྱི་རལ་གྲི་དང་ ཕྱག་གཡོན་པར་ཨུཌ་པལ་ལའི་མེ་ཏོག་བསྣམས། མེ་ཏོག་འདི་གི་ཐོག་ལུ་ ཤེས་རབ་ཀྱི་ཕར་རོལ་ཏུ་ཕྱིན་པའི་ ཆོས་པཱོ་ཏི་བསྣམས་སྦེ་སྒོམ་དགོ
༥ རང་འཇམ་པའི་དབྱངས་སྦེ་སྒོམ་ཏེ་ དབྱེ་བ་མེད་པ་འགྱོ། རང་གི་དོན་ཧིང་གུ་ལས་ འོད་ཟེར་ཁ་མདོག་སྣ་ཚོགས་འཐོན་ཏེ་ ཤར་ཕྱོགས་རི་བོ་རྩེ་ལྔའི་གནས་ན་ལུ་འགྱོ་བའི་ཚུལ་དུ་སྒོམ། ད་རུ་འདི་ཁར་ལུ་ཡང་རང་འཇམ་དཔལ་དབྱངས་སྦེ་སྒོམ་མི་འདི་ བྱང་ཆུབ་སེམས་དཔའ་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་གཞན་ཡང་འདི་ཁར་བྱོན་ཏེ་ མཐའ་བསྐོར་རྐྱབ་སྟེ་བཞུགས་ཡོད་མི་ཚུ་ལས་ཡང་ དབང་དང་བྱིན་རླབས་ཚུ་འོད་ཟེར་གྱི་ངང་ལུ་རང་ལུ་ཐིམ་པར་བསམ་དགོཔ་ཨིན་མས།
༦ དེ་སྦེ་སྒོམ་ཞིནམ་ལས་ འཇམ་དཔལ་ཡེ་ཤེས་སེམས་དཔའ་ འོད་ཟེར་གྱི་ངང་ལས་ རང་གི་གཟུགས་ཁར་ སྤྱི་གཙུག་ལས་མར་ དོན་ཧིང་གུར་འབབ་སྟེ་ དབང་དང་བྱིན་རླབས་ཐོབ་པའི་མོས་པ་གིས་སྒོམ་སྟེ་ སངས་རྒྱས་ཀྱི་གོ་འཕང་མ་ཐོབ་ཚུན་ཚོད་ འགྱུར་བ་མེད་པ་བསྒོམ་ནི་ཨིན་ཟེར་འཇམ་དཔལ་ཡེ་ཤེས་སེམས་དཔའི་གསོལ་འདེབས་ སེམས་རྩེ་གཅིག་གུར་བསྐྱལ་ཏེ་བཏང་དགོ་ཟེར་ཞུ་ནི་ཨིན། །
༧ ང་བཅས་སློབ་དཔོན་དེ་ཚུ་འདི་ལྷབ་སྦྱང་འབད་ནི་ལུ་ཚད་བཟུང་མི་ཅིག་མེནམ་ལས་ རིག་པའི་རྩལ་
དང་རིག་པའི་གནས་ལུ་ལྷག་པར་དུ་ སྦྱང་བརྩོན་འབད་དེ་ ཡར་རྒྱས་བཏང་དགོཔ་འདི་ཧ་ཅང་གི་གལ་
ཆེ་ཟེར་ཞུ་ནི་ཨིན། འདི་ནང་དོག་གཉིས་ལས་ཡང་ སློབ་ཕྲུག་ཆ་ཁྱབ་ཀྱི་འབད་རུང་ རང་གི་ཡོན་ཏན་གི་
རྩལ་ཡར་རྒྱས་བཏང་དགོ་པ་ཅིན་ ཤེས་རབ་ཀྱི་ལྷ་མཆོག་རྗེ་བཙུན་འཇམ་དཔལ་དབྱངས་ལུ་གསོལ་བ་
རྩེ་གཅིག་ཏུ་བཏབ་ཏེ་ དཔེ་ཆ་ལྷབ་དགོ དད་པ་དང་མོས་པའི་སྒོ་ལས་ གསོལ་འདེབས་བཏང་པའི་
སྐབས་སུ་ཡང་ རིམ་པ་བཞིན་དུ་སྒོམ་པ་ཅིན་ གཞན་གྱིས་མ་ཤེས་མི་རང་གིས་ཤེས་ཏེ་ ས་སྟེང་འདི་ན་
ལུ་ མཁས་པའི་མིང་གཏམ་འཐོན་ རང་གི་བསམ་དོན་ཚུ་ཚུལ་བཞིན་དུ་སྒྲུབ་ཚུགས་པའི་ཕན་ཡོན་སྦོམ་
ཡོདཔ་ སངས་རྒྱས་དང་བྱང་ཆུབ་སེམས་དཔའ་ཚུ་གིས་ མདོ་དང་སྔགས་ལས་གསུངས་ཏེ་ཡོདཔ་ཨིན། །
Comments
Post a Comment