བསམ་རྩེ་མཐོ་རིམ་སློབ་གྲྭའི་བསྟོད་གླུ་ཡིད་འཕྲོག་མ།
གདུང་འཛིན་ལྷ་ལས་བརྒྱུད་པའི་མི་དབང་མཆོག །པད་མ་འབྱུང་དང་བླ་མའི་ལུང་བསྟན་ལས། ། བརྒྱུད་འཛིན་གསུམ་པའི་མངའ་བདག་ཆེན་པོ་འབད། །ཕེབས་པ་འབྲུག་པའི་མི་སེར་སྐལ་བ་བཟང་། །
མ་འོངས་འབྲུག་པའི་བསྟན་སྲིད་མི་ཉམས་དོན། །རྒྱལ་ཁབ་ཡར་རྒྱས་ཤེས་རིག་རྩ་བ་བཙུགས། ། ཕྱི་ནང་ཤེས་བྱའི་ཡོན་ཏན་འབྱུང་གནས་ལུ། །ཐུགས་བསྐྱེད་བླ་ན་མེད་པའི་སྨོན་ལམ་བཏབ། །
རིག་གསར་སློབ་སྟོན་མཆོག་གྱུར་ཞིབ་འཚོལ་ཚུ། །བསམ་རྩེ་མཐོ་རིམ་སློབ་གྲྭའི་དམིགས་གཏད་ཨིན། ། མཐོ་རིམ་སློབ་གྲྭ་བཀྲ་ལ་ཤིས་པར་ཤོག །མཐོ་རིམ་སློབ་གྲྭ་གཡང་ལ་ཆགས་པར་ཤོག །
སྤྱི་ལོ་གཅིག་སྟོང་དགུ་བརྒྱ་རེ་བརྒྱད་ཀྱི། །སྤྱི་ཟླ་ལྔ་པའི་ཚེས་བཟང་ཉེར་དགུ་ལུ། ། བསམ་བཞིན་སྨོན་ལམ་བཏབ་པའི་འབྲས་བུ་ལས། །ཤེས་ཡོན་ལྟེ་བ་སློབ་དཔོན་སློབ་སྦྱོང་ཆགས། །
སྤུས་ཚད་ལྡན་པའི་ཤེས་ཡོན་མཁས་མཆོག་དང་། །ཞིབ་འཚོལ་རིག་རྩལ་སློབ་སྟོན་ཐབས་ཤེས་དང་། ། ཁྱད་རིག་ལྡན་པའི་བསླབ་སྟོན་ཤེས་ཡོན་ཚུ། །ཤེས་རིག་གོང་འཕེལ་གཏང་ནིའི་སྦྱོང་བརྡར་ཨིན། །
སློབ་སྟོན་རིག་རྩལ་འཕེལ་བའི་ཆོས་ཚན་ཚུ། །བསམ་རྩེ་མཐོ་རིམ་སློབ་གྲྭའི་དགོས་དོན་ཨིན།
། མཐོ་རིམ་སློབ་གྲྭ་བཀྲ་ལ་ཤིས་པར་ཤོག
།མཐོ་རིམ་སློབ་གྲྭ་གཡང་ལ་ཆགས་པར་ཤོག །
ཡོན་ཏན་ཕུན་སུམ་ཚོགས་པའི་སློབ་དཔོན་གྱིས། །སྦྲང་རྩི་བུང་བ་སློབ་མའི་ཚོགས་རྣམས་ལུ། ། ཆོས་ཚན་གངྒའི་ཆུ་རྒྱུན་བདུད་རྩིས་རླབས། །སློབ་སྟོན་དབྱར་གྱི་ཆར་རྒྱུན་བཟུམ་སྦེ་འབབ། །
ལུས་སྦྱོང་རྩེད་རིགས་རྣམ་པ་མ་འདྲཝ་ཚུ། །ཕུན་ཚོགས་བདེ་བའི་ཐང་ལུ་རྩེད་འགྲན་ཚེ། ། རྣམ་དཔྱོད་ཡངས་པའི་རིག་པ་ཤེས་རབ་རྒྱས། །ཤེས་བྱའི་གནས་ལུ་སློབ་མའི་ལུས་སེམས་ངོམ། །
སྦྱང་པ་མཐར་ཕྱིན་རྒྱལ་ཁབ་མཐའ་དབུས་མེད། །ཕྱི་ནང་ཡོན་ཏན་སྤེལ་བའི་དགའ་སྟོན་གིས། ། མཐོ་རིམ་སློབ་གྲྭ་བཀྲ་ལ་ཤིས་པར་ཤོག །མཐོ་རིམ་སློབ་གྲྭ་གཡང་ལ་ཆགས་པར་ཤོག །
Comments
Post a Comment